啱啱睇新聞﹐又有傳銷公司利用不良手法去做生意！見到呢啲新聞﹐真係覺得超級無奈﹐我自己都有參加傳銷公司，就係因為呢啲無良嘅人或公司﹐搞到好多時啲人一聽到「傳銷」二個字﹐都好似見鬼咁﹐走夾唔抖！就算幾best fd 都好﹐見到你﹐比面嘅咪應酬你兩句囉﹐有啲莫講話見面﹐連見到來電顯示係你﹐直頭電話都唔聽﹐直接 cut 你線！！！甚或﹐有人知道某朋友參加傳銷公司﹐就會不停咁同呢位朋友講︰「你唔好信佢哋呀﹐佢哋會同洗腦架﹐係呃人架﹐你唔好做啦﹐呢啲嘢唔啱你做架..........」諸如此類嘅說話！！！

       莫論大家對傳銷公司有乜睇法、接唔接受、又或者會唔會參加傳銷公司都好，都希望大家可以多面睇﹐就算係傳統生意﹐有無人可以好肯定咁話我知，所有傳統生意都係行正路去搵錢﹐而﹐絕無奸商？

       如果﹐有打算加入傳銷公司嘅﹐真係唔該你哋﹐絕對要了解清楚該間公司嘅背景﹐仲有﹐一間正軌嘅傳銷公司﹐佢哋係絕對唔會叫你向財務公司借錢做生意﹐唔會要你交入會費﹐更加唔會叫你大量入貨！

第一︰喺你最初參加時﹐你根本未完全熟識呢間公司嘅運作﹐一嚟就叫你同財務公司借錢﹐如果﹐係限期前﹐你未能搵到錢找數﹐結果會係點？

第二︰一參加就叫你大量入貨﹐萬一﹐喺貨物嘅過期日之前﹐你未能全數賣出貨物﹐結果又係點呢？

       而﹐我自己亦有一個經驗﹐就係有朋友介紹我去做一間層壓式嘅傳銷公司﹐朋友嘅上線介紹呢個生意時﹐佢竟然可以同我講﹐去到第幾代下線之後﹐我可以唔理佢﹐以我嘅理解係﹐某啲下線，我可以唔使理佢哋嘅死活﹐亦有叫我向財務公司借錢﹐最奇怪嘅係﹐呢位上線同我講﹐呢間公司好可能喺幾年之後轉換傳銷產品﹐即係而家賣緊健康食品﹐幾年後﹐可能變咗賣樓或股票！

      當然﹐我好彩﹐我好細個就有機會去接觸傳銷呢門生意﹐而且﹐有機會認識到某啲公司做生意嘅手法﹐仲有人教我點去分析﹐而﹐我亦係一個好了解自己嘅人！但係﹐無奈﹐我呢位朋友好相信呢間公司﹐我亦唔想去打擊佢﹐唯一就係由得佢做自己鐘意做嘅嘢！

      最後﹐都要提醒大家一樣嘢﹐做任何事都必須要付出努力﹐呢個世界係無免費午餐嘅﹐雖然﹐傳銷生意可以提供一啲比較舒適嘅搵錢方法﹐但係﹐唔等如你可以走捷徑﹐傳銷生意同樣係要付出你嘅努力！